Memories o' the Afton Buildings
By Patrick Dornan
Hame fae the schule an af wi the claes
intae the auld yins an oot
a pair o auld sannies wi cut oot taes
up the burn guddlin trout
Short troosers and skint knees
tackity bits makin sparks
these are some o ma memories
oot playin in the dark
We hud nae tellys then tae keep us in
an nae fightin ower a channel
we hud only the wireless tae listen in
tae Dickson Barton ur Wullie McFlannel
We had gems fur the lassies and gems fur the boys
an gems whaur we aw played the gither
an tho' we didnae hae too muny toys
whit we did hiv, we share wi each ither
The soon o the baws hittin the waws
skippin ropes skelpin the grun
oot et nicht chappin oan doors
chicken-ellie by jings that wis fun
We had rin sheep rin and kick the can
an huntin an hide an go seek
an it's thoosans o miles ah must hae run
wi ma favourite auld gird and cleek
Aye thae wur the days when the sun always shone
frae May tae the end o September
but sadly noo thae days are aw gone
but its great tae think back an remember
|